Taylor Swifts supersalg
For fyrste gong på to år har ein artist solgt meir enn ein million album på éi veke.
Taylor Swifts Speak Now kom ut forrige veke, og når salgstala no er klare viser det seg at ungjenta har god grunn til å vera nøgd: Albumet solgte 1 047 000 eksemplar, og Swift plasserer seg med det i ein temmeleg eksklusiv klubb av artistar som har solgt over millionen den fyrste veka, i følge Billboard.
Ikkje sidan Lil Wayne slapp Tha Carter III i 2008 har eit album bikka den magiske grensa. Speak Now er eitt av seksten album som sidan 1991 (då den amerikanske albumlista byrja å registrera salgstal) har nådd over ein million. Ettersom platebransjen som kjent har traska i motbakke dei siste åra, er det ikkje venta at dette er ei liste som kjem til å utvida seg i så veldig stor fart i tida framover.
For den nysgjerrige: Albumet som i følge Billboard har solgt mest i løpet av éi veke er ‘N Syncs No Strings Attached frå 2000. Nummer to: ‘N Syncs Celebrity frå 2001.
Taylor Swift kjem til Oslo Spektrum 9. mars. Fram til då kan du sjølvsagt høyra på Speak Now.
