Ja, det var ordet Jo Inge Gåsvær brukte etter kondisjonstesten fredag. Det håndfaste bevis på at eg ikkje har drive dank der ende i Frankrike. Men han blir litt forsiktigare når han skal uttrykke seg skriftleg, han der Jo Inge. Fekk mail frå han no, og der tek han litt forsiktigare i…
Kondisjonstesten følgjer same mønster kvar gang: Først syklar eg (på ein ergometersykkel) fem minutt på 50 watt belastning, så fem minutt på 100 w, så fem minutt på 150 w, og så vidare, så lenge eg greier. Kvart minutt noterer Jo Inge pulsen. På dei forgåande testane har eg vore døden nær etter to minutt på 200 w belastning, og måtta gi meg der. Denne gangen sykla eg fem minutt på 200 watt, og det ergrar meg egentlig no at eg ikkje tok eit minutt eller to på 250 watt, for det kunne eg greidd. Bøtt, bøtt, som dei seier i England. Pulsen låg lågare på alle nivå denne gongen enn nokon gong før, og det utan at eg har sote på eit sykkelsete på fem veker.
Denne sit eg på ca. ein halv time i månaden. Det er akkurat lenge nok, spør du meg.
Her er det Jo Inge skriv:
Vurdering i samband med treninga så langt og test
Du har hatt ei fin utvikling sidan sist! Når eg analyserer reine pulsresultat ligg du ”berre” noko betre an enn forrige gong. Du kjem i tillegg ut med eit maksimalt oksygenopptak berekna til 27,6 ml/kg/min. Ut i frå tabellen for normalbefolkninga blir du klassifisert til å ha eit lavt uthaldsnivå. Men som eg har nevnt til det kjedsommelege for deg; denne testen har relativt store usikkerheiter innebygd. Spesielt blir tolkinga feil når du no har ei mykje høgare muskelmasse enn det du hadde tidlegare.
Når eg så ser på pulsverdiane og belastning du vart testa på, er biletet mykje betre. På tidlegare testar har du ”møtt veggen” på ei belastning på 200 watt, og vore sjanselaus på å halde meir enn 2 min. Denne gongen gjennomførte du greitt 5 min på denne belastninga. Og det er ein stor framgang!
Når du no er vel heime etter gåturen er hovudfokus å bruke mest mogeleg tid på sykkelen (evt. kombinert med bratte motbakkar bak huset!). Dei neste to vekene syklar du det du har tid til, minimum tre timesøkter per veke. Etter det har du jo ferie, og då må vi byrje å spisse formen inn mot rittet. Og då skal treninga hovudsakleg bestå av lange turar (fleire timar) kombinert med ein del harde intervalløkter.
jo